..الدلال البغاديد..
. أناوجودي وجد من يعرف الكيف ..
اليا توجّدْ لدلال البغاديد .
..
. لاشافهن شلّته نشوه بتشنيف ..
وتجمح به الذكرى لمرباعة البيد .
..
. وقام اِيتَعزوى من عوالي المشاريف ..
يشوقه الماضي وهي له عواييد .
..
. لا جيت ابا أوصفهن تضيع التواصيف ..
ماغير اقول الفيد يا الي تبا الفيد .
..
. النادرات الصنف ماهن بتزييف ..
الشامخات اعناقهنّ الفراهيد .
..
. ان قلت مثل البط ياهن مهاديف ..
كاهن كما هن فوق زين المواقيد .
..
. احمس ..وزود هيلهن للمواليف ..
من بن صنعاء لا تعداه وتحيد .
..
. لقمهن الحمسه وخشمهن ابليف ..
أشقر يزل الغثر ويزيّن الجيد .
..
. من دمها نشرب ونكرم بها الضيف
ونفخر بها لانها شعار الأجاويد .
..
. الشعر والقهوه مع خنجر وسيف ..
رمز العروبه والرجال الصناديد .
..
. وانا أُعربي ومرقبي عالي أمنيف ..
من لابة مايخلفون المواعيد .
..
. والشعر فكره صغتها دون تكليف ..
ولا راسي بغاوي ولا احب تعقيد .
..
. لي هاجس يروم العوالي المشانيف ..
وحلايلي يردن على الماء مواريد .
..
. جَنّي وانا في قمة الشوق للكيف ..
وقلت اعزفنها في الدلال البغاديد .
..
. كانت وكنا واختتمنا السواليف ..
بالشكر والتسبيح لله تمجيد
ياقايد الشوق في غابات احلامي
يامتعب الفكر لاهاجت لك اشواقي
..
ياهاجس الليل ياحبري واقلامي
ياطيف ينسج خياله داخل اوراقي
..
وياذيب يعوي على الطاري مع اوهامي
في ليل موحش ولافي الحي من تاقي
..
ارفق بحال الغريب الهايم الضامي
الي مقضي نهاره في العمل شاقي
..
لاشفت طيفك بتالي الليل قدامي
افز لك شوق واصرخ داخل اعماقي
..
وارجع بدونك واضمد جرحي الدامي
وانام واصحى على طاريك مشتاقي
